香港在職媽媽的日與夜　請還我親子時間

嫻姐的facebook絕大部分是媽媽級朋友，平時交流下仔女經，最近不停被「日本全職媽媽24小時日與夜」洗版，戳中不少全職媽媽的心聲，聲淚俱下地力陳自己的苦累！

我完全體會到這位日本全職媽媽的苦況，其實香港在職媽媽亦辛酸，容我分享下自己的「日與夜」！

香港在職媽媽比例可能是世界之最，原因離不開經濟壓力，香港樓貴、學費貴、生活費貴，供樓租樓已佔去家庭收入一大部分，僅靠爸爸賺錢，未必足以應付生活所需。

但亦有特殊例子，我有個朋友本來已經辭工回家做全職媽媽，豈料幾個月後請菲傭重返職場，問及原因竟然是因家人不理解，老爺奶奶單單打打，經常不經意地在她面前呻自己兒子辛苦，獨力揹起頭家，還說「邊好似你咁舒服，日日係屋企唔使做咁嘆！」

朋友重返職場後經常性OT，她原本將女兒交給託老爺奶奶照顧，直至某天她被女兒問：「媽媽，爺爺嫲嫲話你唔錫我，成日唔理我，我係咪唔乖？」

朋友聞言落淚，後來才發現原來老爺奶奶經常幫女兒「洗腦」，她最後選擇請菲傭。

坦白講，我真的好想、好想做全職媽媽，陪伴皇帝仔成長，見證他成長每個不可逆轉的神聖時刻；事實上，我與先生要交租、要食飯，要交皇帝仔學費，去除基本使費後，已經無力請工人姐姐幫手，幸好多年來靠家中「四大長老」幫忙接皇帝仔放學，我才可以安心上班，與先生共同承擔一頭家。

正常情況下，我每日早上6點起床煮早餐，送皇帝仔上學後趕回公司上班，收工後買菜煮飯，陪皇帝仔做功課，做家務，沖涼睡覺，還有6小時睡覺時間。

更加「正常」的是，OT是香港打工仔的通病，合約寫明是朝9晚6，但朝9晚8是常識吧！OT的代價是一家三口要食連鎖快餐廳、茶餐廳的味精飯，隨後急急腳趕回家陪皇帝仔做功課，沖涼、做家務…

當我凌晨1點躺在床上準備睡覺，手機突然響起WhatApp提示音，「咁夜肯定唔使問阿貴」，那是老闆的奪命追魂Call，處理好往往已經凌晨兩點，離起床時間尚餘4小時。

老細！我好鍾意周公㗎，可唔可以唔好OT？可唔可以唔好半夜send 短訊過來，我真係好想好想睡多兩粒鐘啊！

我不敢說在職媽媽很偉大，養兒育女這條道路是自己選擇，再辛苦也要走下去，再痛苦也要捱下去，

養大仔女、培育他們成為對社會有貢獻的人，是人生最大的挑戰，雖苦亦快樂，相信這是每個媽媽的心底話！

有人為生活所困，被迫將照顧子女的責任交託給工人姐姐或父母，每晚在公司OT中度過，回到家子女已進入夢鄉，想傾下計都是奢望，相比而言，我每天能陪伴皇帝仔溫書、做功課，已經很幸福。

作為在職媽媽，我真心希望「天下公司無OT，還在職媽媽真正的親子時間」。

都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！

【延伸閱讀】 前銀行高層不再做嚴父 化身人生教練陪子女成長

【延伸閱讀】  9GAG不信面試　 高價請人令團隊無後顧之憂